Blinken hittir leiðarar í Qatar

Amerikanski uttanríkisráðharrin, Antony Blinken, er á veg til Qatar, og tað er fyrsta ferð hansara til landið, síðani Taliban tók valdið í Afganistan, skrivar AFP-tíðindastovan.

USA hevur eina stóra herstøð í Qatar, og hagar eru 55.000 fólk komin, sum eru flýdd úr Afghanistan.

Antony Blinken, sigur, at hann fer at heilsa upp á stjórnina í Qatar og takka landinum fyri alla hjálpina, sum tað hevur veitt, nú altjóða deildirnar eru farnar úr Afganistan.

Blinken fer eisini at hitta afganar, sum eru flýddir úr landinum, og amerikanskar diplomatar, sum hava flutt sítt virksemi úr Kabul til Doha í Qatar.

Italia flytur sendistovu til Doha

Italia fer at flyta sína sendistovu í Afganistan til høvuðsstaðin í Qatar, Doha.

Tað boðaði uttanríkisráðharrin, Luigi De Maio, frá í gjár, sambært Reuters.

Qatar er blivið ein diplomatiskur miðdepil eftir Afganistan, eftir at taliban tók valdið í landinum. Taliban-stýrið hevur nevniliga sjálvt skrivstovu í Doha. 

Italski uttanríkisráðharrin hitti í gjár sín starvsbróður úr Qatar fyri at gera eina avtalu um sendistovuna í landinum.

Sendifólk úr fleiri londum fóru úr Afganistan til Qatar, tá taliban tók valdið.