Skeljungur atkvøður um at selja Magn

7. oktober fara partaeigararnir í íslendska oljufelagnum Skeljungi at atkvøða um uppskotið hjá nevndini um at selja dótturfelagið í Føroyum, Magn.

Partaeigarafundurin verður í Reykjavík.

Fyri trimum vikum síðani boðaði Skeljungur íslendska keypsskálanum frá, at føroyska smápartafelagið, Orkufelagið, var í samráðingum um at keypa Magn. 

Einkarrætt at samráðast

Ben Arabo segði við Útvarpið tá, at felagið hevur næstu átta vikurnar fingið einkarrætt at samráðast, men at partarnir longu eru samdir um tey yvirskipaðu viðurskiftini í sambandi við keypið.

Miðað verður eftir, at endaliga avtalan verður klár í november. 

Sambært fráboðanini er keypsprísurin 606 milliónir krónur í okkara peningi.  Við í tí prísinum eru yvirtikin skuld og onnur fíggjarlig viðurskifti.

Partabrøvini verða keypt fyri 493 milliónir krónur í okkara peningi.

Stovnaðu felagið í februar

Ben Arabo, Teitur Nolsøe Poulsen og Tommy Næs Djurhuus stovnaðu 16. februar í ár smápartafelagið Orkufelagið. 

Teitur Nolsøe Poulsen er nevndarformaður, og Ben Arabo er stjóri. 

Endamálið hjá felagnum er at stovna og reka orkukeldur, gera íløgur og annað virksemi í hesum sambandi.

Skeljungur ætlar at selja Magn, tí felagið ætlar at minka oljusøluna og heldur leggja dent á aðrar orkukeldur.