Nú kann Skeljungur selja Magn

Íslendska oljufelagið Skeljungur fer at selja dótturfelagið Magn.

Tað samtyktu partaeigararnir í Skeljungi í gjár. 

Føroyska smápartafelagið, Orkufelagið, ætlar at keypa Magn. Miðað verður eftir, at endaliga keypsavtalan verður klár í november. 

Magn verður keypt fyri 606 milliónir krónur í okkara peningi. Við í tí prísinum eru yvirtikin skuld og onnur fíggjarlig viðurskifti.

Partabrøvini verða keypt fyri 493 milliónir krónur í okkara peningi.

Ben Arabo stjóri

Ben Arabo, Teitur Nolsøe Poulsen og Tommy Næs Djurhuus stovnaðu 16.februar í ár Orkufelagið. 

Teitur Nolsøe Poulsen er nevndarformaður, og Ben Arabo er stjóri. 

Endamálið hjá felagnum er at stovna og reka orkukeldur, gera íløgur og annað virksemi í hesum sambandi.

Skeljungur fer at selja Magn, tí felagið ætlar at minka oljusøluna og heldur leggja dent á aðrar orkukeldur.