Iran til reiðar at tingast um kjarnorkuavtaluna

Iran er til reiðar at fara undir aftur samráðingar um kjarnorkuavtaluna, sum varð gjørd í 2015, men sum fór fyri bakka, tí USA tók seg burtur úr avtaluni.

Mett verður, at støðan er torførari nú, enn hon hevur verið, tí tey víðgongdu í Iran vunnu valið fyrr í ár.

Iranski varauttanríkisráðharrin, Ali Bagheri, sigur, at hann hevur tosað við ES um avtaluna.

Við á fundinum í Brússel var eisini ovasti samráðingarleiðarin í ES, Enrique Mora, sum var í Teheran fyrr í mánaðinum.

Ein talsmaður í amerikanska uttanríkisráðnum, Ned Price, sigur, at USA stuðlar átakinum hjá ES.

Eftir at USA tók seg burtur úr avtaluni, hevur Iran lagt størri dent á at ríka uran, samstundis sum fólk hjá eftirlitsmyndugleikunum hava torførari at sleppa til Iran.

Joe Biden, forseti, hevur sagt seg taka undir við at fáa lív í aftur avtaluna, men hann viðgongur samstundis, at tað er lættari sagt enn gjørt, skrivar NTB.