Sjóvinnustýrið: Eingin niðurstøða, hví alibátur sakk

Eingin niðurstøða kann gerast, men nakrar ábendingar eru, sigur Sjóvinnustýrið um hendingina, tá alibáturin Krossteinur hjá Bakkafrosti sakk eystur úr Porkerisnesi á Hovsfirði um morgunin 8.apríl.

Tveir menn vóru við Krossteini, tá hann sakk. 

Ein annar alibátur, Stórafles, sum var farin undir at sleipa Krosstein á Vág, bjargaði teimum.

Roykur kom úr maskinrúminum á Krossteini. Báðir motorar í Krossteini gingu heitir og blivu sløktir.

Stutt eftir, at sleipingin byrjaði, fekk Krossteinur slagsíðu.

Sjóvinnustýrið nevnir ábendingar um, hví nógvur roykur var í maskinrúminum, tí eldur var eingin.

Eingin ivi er um, at báturin lak.

Kann hava fingið skaða

Ein ábending er um, at Krossteinur fekk skaða, tá hann lá í Hovi í ringum veðri.

Ein onnur ábending er, at kølingin er gingin fyri á báðum motorum umleið samstundis. 

Manningin sigur, at eingin eld- ella roykávaring kom og heldur eingin lensialarmur. 

Sjóvinnustýrið fekk at vita, at alarmurin á útstoytinum var tikin av skipanini í sambandi við eina umbygging.

900 litrar av olju vóru í tangunum, tá Krossteinur sakk.

Krossteinur, sum var tvíkilja, var bygdur í 2013.