115 smittað í gjár

Tamarhald er ikki á koronusmittuni í Føroyum, tí bara í gjár blivu 115 nýggir smittutilburðir staðfestir, og tað er met, staðfesti Lars Fodgaard Møller, landslækni.  

Løgmaður heitti á fólk um at halda tilmælini, sum landsstýrið sendi út í gjár. 

Annars ætlar hann ikki at seta onnur tiltøk í verk. 

Koppsett minni kjans fyri at blíva sjúk

Tað sæst, at fólk, sum eru koppsett hava fimm ferðir minni kjans fyri at gerast sjúk, vísti landslæknin á. 

Sjúkueyðkennini eru eisini færri, og man verður ikki líka illa fyri. 

Roynt hevur verið at demma smittuna inni lokalt, men tað hevur ikki eydnast, ásannaði landslæknin, tí smittan breiðir seg skjótt kring landið.

Suðuroyggin er einasta stað, sum er sloppið nøkulunda snikkaleys undan nýggjasta útbrotinum. 

Starvsfólk hótt

Bæði løgmaður og fútin søgdu, at starvsfólk, ið standa fremst í bardaganum móti koronusmittuni, verða hótt. 

Fútin gjørdi vart við, at tað verður sett hart niður á slíkar hóttanir, og at tílík mál enda í rættinum. 

"Starvsfólk, sum arbeiða við okkara veiku og sjúku, mugu fáa frið til at gera sítt góða arbeiði," staðfesti løgmaður.