Átta milliónir krónur afturat til bardagan móti koronu

Sjúkrahúsverkið hevur boðað Fíggjarnevndini hjá løgtinginum frá, at tað longu nú kann siga, at tað hevur biðið um ov lítið av pengum til at berjast móti koronu í uppskotinum um eykajáttanarlóg, sum Fíggjarnevndin viðger.

Biðið verður um átta milliónir krónur afturat.

Í lógaruppskotinum verður biðið um tvær millónir til koppsetingar.

Nú verður biðið um átta milliónir afturat til kanningar, greiningar, koppsetingar og Koronudeildina.

Ein tillagað meting er, at 4.000 koronukanningar verða gjørdar í Sjúkrahúsverkinum um vikuna, tað sum eftir er av árinum. 

Aldursmarkið fyri koppsetingar er lækkað niður í 12 ár, og nøkur skulu hava triðja prikið.

Og biðið verður um 770.000 kr. afturat til Koronudeildina, sum annars skuldi takast niður fyri 500.000 kr.