Triðingurin av ullini er seldur

Búnaðarstovan hevur selt triðingin av ullini, sum var lýst til sølu í oktober.

Talan var um 22,8 tons.

Nógv tað mesta, stivliga 20 tons, er fyrsti flokkur. Og ein tríðingur av teirri ullini er seldur. Tveir keyparar eru.

Roynt verður at selja alla ullina. Ullin er í seks náttúrulitum. Tað mesta er hvítt.

Hálvt triðja tons eru annar flokkur. Tann ullin er ikki skild í litir.

Ullin verður seld í ballum, sum viga 250 kg.

Ullin verður seld sambært skrivligum, bindandi boði, sum skuldi latast Búnaðarstovuni í seinasta lagi 20.oktober.

Búnaðarstovan miðar eftir einum minstaprísi, sum er 8,00 kr. fyri kilo í fyrsta flokki og 2,00 kr. fyri kilo í øðrum flokki, umframt meirvirðisgjald.