Nú standa 12.400 milliardir í norska oljugrunninum

Norski oljugrunnurin setti fríggjadagin met, tá hann vaks við 1.000 milliardum norskum krónum seinsta mánaðin, og er nú 12.400 milliardir.

Miðskeiðis í oktober vóru 11.400 milliardir norskar krónur í grunninum.

Hetta er størsta virðið, sum oljugrunnurin nakrantíð hevur havt, skrivar E24.

Almenna virðið í grunninum verður kunngjørt hvønn ársfjórðing.

Støre fær meiri at brúka

Hvørja ferð, at oljugrunnurin veksur við 100 milliardum, fær norski forsætisráðharrin, Jonas Gahr Støre, tríggjar milliardir meira at brúka næsta ár.

Tað merkir, at um virðið heldur sær til á nýggjárinum, fær norska stjórnin 370 milliardir norskar krónur at brúka.

Við virðinum, sum var miðjan oktober, hevði tøka upphæddin verið 340 milliardir norskar krónur. 

Stjórnin hjá Støre skeyt her fyri upp at brúka somu upphædd næsta ár, sum stjórnin hjá Solberg mælti til fyrr í heyst, ella 322 milliardir norskar krónur. 

Men Arbeiðaraflokkurin og Senterflokkurin eru nú í samráðingum um fíggjarlógina við Sosialistiska Vinstraflokkin, sum vil minka fíggjarlógina næsta ár.