Risastór uppgáva bíðar Føroyum í Sevilla

Í kvøld spælir føroyska landsliðið sín síðsta undankappingardyst í ár.

Lítil ivi mann vera um, at hetta er ein hin størsta uppgávan hjá einum føroyskum landsliðið higartil, tá sterka spanska landsliðið tekur ímóti í Sevilla. 

Spaniólarnir hava vunnið allar sínar dystir í undankappingini. 6-0 á Ukreina, 7-0 á Ungarn og ikki minni enn 10-0 á Føroyum á Tórsvølli. 

Tí vita føroysku spælararnir alt um, hvussu gott mótstøðuliðið er í kvøld á Estadio La Cartuja de Sevilla leikvøllinum, sum tekur heili 60.000 áskoðarar. 

 - Men samstundis er hetta ein spennandi uppgáva og ein uppliving. Vit mennast í heilum sum hópur og lið, og tað arbeiða vit hart fyri at vísa á vøllinum eisini. So vit geva veruliga alt, sum vit eiga, fyri at gera tað trupult fyri tær at spæla ímóti okkum, sigur Ásla Johannesen við heimasíðuna hjá fótbóltssambandinum.

Føroyar hava spælt fýra dystir í undankappingini higartil, og hava tapt allar fýra; ímóti Spania, Skotlandi, Ukreina og Ungarn.