Ikki frítt longur at velja skúla í Havn

Trivnaðarnevndin í Tórshavnar kommunu hevur samtykt at broyta leiðreglurnar fyri skúlaval, og setur í gildi grund-upptøkuøki. 

Grundupptøkuøkini eru gjørd út frá talinum av børnum, sum hava aldur at fara í fyrsta flokk skúlaárið 2022/23.

Í fjør vórðu nógv fleiri børn skrivað inn í Skúlan á Fløtum, enn pláss er fyri, og tí eru upptøkureglurnar nú dagførdar.

Dagføringin merkir, at um so er, at pláss ikki er fyri øllum innskrivaðu børnunum, sum búgva í grundupptøkuøkinum hjá einum skúla, verða tey flutt í skúla í grannaøkinum.

Børn, sum kanska ikki fáa pláss har, verða flutt eftir somu leiðreglu, skrivar Tórshavnar kommuna.