Betri-samtakið: Tveir eftirlitsmyndugleikar kunnu vera ein váði

Tað kann vera ein váði, at tveir myndugleikar, annar danskur og hin føroyskur, hava eftirlit við Betri samtakinum, sigur Føroya váðaráð.

Tað kann vera ein váði, tí tað kann ávirka fíggjarliga støðufestið í Føroyum, sigur Váðaráðið.  

Í Betri-samtakinum eru eitt móðurfelag og trý dótturfeløg. 

SIFI-banki

Dótturfelagið Betri banki er ein SIFI-banki, men dótturfelagið Betri trygging er eitt systemiskt týdningarmikið skaðatryggingarfelag í Føroyum.

Trygging er yvirtikin, men virksemið hjá peningastovnunum er framvegis danskt málsøki. 

Eftirlitið við tryggingarpartinum, tað er við Betri pensjón og Betri trygging, er í Føroyum.

Eftirlitið við Betri Banka og móðurfelagnum, partafelagnum Betri, er hjá danska Fíggjareftirlitinum og Fíggjarligum støðufesti.

Kann ávirka fíggjarliga støðufestið

Skuldi Betri banki komið í fíggjarliga trongstøðu, er møguligt, at Fíggjareftirlitið og Fíggjarligt støðufesti ikki fara at hava nóg stórt fyrilit fyri systemiska týdninginum, sum Betri trygging hevur, tí Fíggjareftirlitið og Fíggjarligt støðufesti fyrst og fremst hava sum endamál at bjarga bankanum. 

Og teimum nýtist ikki at spyrja Tryggingareftirlitið í Føroyum. 

Hetta kann hava ávirkan á fíggjarliga støðufestið í Føroyum, sigur Váðaráðið.