Ukraina: Fleiri enn 2.000 sivilfólk deyð

Ukrainskir myndugleikar boða í dag frá, at fleiri enn 2.000 sivilfólk eru deyð í landinum, síðani Russland gjørdi innrás. 

- Hesar sjey krígsdagarnar hevur Russland oyðilagt fleiri hundrað bygningar, undirstøðukervi, sjúkrahús og barnagarðar. Í hesum tíðarskeiðnum hava fleiri enn 2.000 latið lív. Tey, sum eru partur av verjuni hjá landinum, eru ikki tald við í hesari uppgerðini. 

Tað siga ukrainskir myndugleikar í dag. Teir leggja aftrat, at 10 bjargingarfólk eru eisini deyð. 

Bjargingarfólkini hava sløkt fleiri enn 400 eldar, sum stava frá russisku spreingingunum.

Haraftrat eru fleiri enn 870.000 flýdd av landinum síðani innrásina, vísir uppgerð hjá ST. 

Fólk í ukrainska høvuðsstaðnum, Kyiv, leita sær nú skjól á tokstøðum í býnum undan russisku rakettunum.

Sjúkrahúsini eru heldur ikki trygg, og sjúklingar og barnakonur eru flutt í kjallaran.

Sí videobrot frá AP-tíðindastovuni her: