Russisk fiskiskip sleppa ikki í íslendskar havnir

Russisk skip, sum fiska kongafisk, sleppa ikki longur í havn í Íslandi.

Skipini hava havt undantaksloyvi til at avreiða og umskipa í íslendskum havnum.

Men í gjár kunngjørdi íslendska stjórnin, at hetta undantaksloyvi, sum er frá 1999, er ikki galdandi longur.

Diplomatisk grundgeving

Grundgevingin er eisini diplomatisk. Hon er, at Ísland vil ikki gera tað lættari hjá londum at fiska úr stovnum, sum ikki verða nýttir á burðardyggan hátt.

Slík skip eru ikki vælkomin í Íslandi. 

Heldur ikki skip, sum fiska fiskasløg, sum Ísland og viðkomandi land ikki hava sáttmála um, eitt nú kongafisk á Rygginum.

Fáa ikki undantak longur

Tó verður lagt afturat, at russiska framferðin í Ukraina ger, at Ísland kann ikki geva russiskum skipum undantaksloyvi longur.

Í nógv ár hevur verið tosað um at taka aftur undantaksloyvið. Tað verður so gjørt nú, Russland hevur gjørt innrás í Ukraina.