Ráðið fyri gransking og menning fer nú til verka

Ráðið fyri gransking, menning og nýskapan fer at virka um eina góða viku, tann 31.mars.

Tað skal millum annað arbeiða við einari strategiskari ætlan um gransking í Føroyum og uttanlands. 

Tað sigur Jenis av Rana, landsstýrismaður, í svari til Eyðgunn Samuelsen, løgtingskvinnu, sum spurdi um pengar til heilsugransking. Sjúkrakassagrunnurin fíggjaði heilsugranskingina.

Samgongan hevur uppraðfest at skipa føroyska granskingarøkið við at smíða nýtt lógarverk fyri økið, sigur Jenis av Rana. 

Ein lóg kom í 2020 um ráðgeving og stuðul til gransking, menning og nýskapan.

Og kunngerðin um limir í ráðnum fyri gransking, menning og nýskapan kom í fjør.

Landsstýrisfólkini kunnu soleiðis í einari felags fyrisiting fáa upp í hendi at umsita granskingarjáttanina, sum tey hava.

Tá verður so skipað ein sjálvstøðug faknevnd, sum skal stjórna stuðulsskipanum og hava evstu ábyrgd av málsviðgerð og avgerð um at játta stuðul.

Løgtingið hevur eisini samtykt sáttmála um atlimaskap í granskingar- og nýskapanarsamstarvinum hjá ES, Horizon Europe.