Nú eru fleiri enn fýra milliónir flýdd úr Ukraina

Meira enn fýra milliónir fólk eru nú flýdd úr Ukraina, síðani Russland 24. februar gjørdi innrás í landið.

Tað vísir yvirlitið hjá ST-stovninum fyri flóttafólk.

Nýggjasta talið er frá í gjár, og tað er 4.019.287 fólk.

Flestu flóttafólkini, 2,3 milliónir, eru flýdd til grannalandið Pólland, 600.000 eru flýdd til Rumenia og nærum 400.000 til Moldova.

Milliónir flýggja í Ukraina

Fleiri milliónir fólk flýggja eisini í Ukraina undan russisku álopunum.

Altjóða Reyðikrossur og Reyði Hálvmáni, IFRC, upplýsir, at umleið 18 milliónir fólk í Ukraina hava tørv á humaniterari hjálp í løtuni.  

Leiðarin fyri IFRC, Francesco Rocca, sigur, at ukrainski Reyðikrossur hevur, síðani innrásin byrjaði, hjálpt 400.000 fólkum við mati, seingjarklæðum, teppum, tjøldum og vatni. 

- Eingin í Ukraina er sloppin undan krígnum, sigur Rocca.