Landsstýrismaðurin: Tað almenna skal lata privat feløg bora jarðhitaholini

Tað er kanska ikki so skilagott, at tað almenna beinleiðis fer undir at bora niður á heitt vatn, serliga ikki, um privat feløg eru før fyri at loysa uppgávuna í fríari kapping. 

Men tað almenna má í hvussu so er átaka sær lutin at samskipa millum fólk, sum búgva í einum øki, og privatar veitarar av jarðhitaloysnum, so øll stigini frá hugskoti til rakstur av eini felags jarðhitaloysn koma í trygga legu. 

Eisini er neyðugt at hava í huga, at felags orkuloysnir fyri bústaðir í einum øki eru lættast at samskipa, um kommunan leggur upp fyri slíkum ætlanum í sambandi við útstykking. 

Tað sigur Magnus Rasmussen landsstýrismaður, sum hevur svarað Bill Justinussen, løgtingsmanni, sum spurdi um heitt vatn í undirgrundini.  

Landsstýrismaðurin sigur, at síðani 2014 hevur Jarðfeingi mált hitan í jarðhitaboringum fyri at fáa eitt betri yvirlit yvir hitalagið í tí grunnu undirgrundini. Í dag eru meira enn 500 boringar máldar í flestum oyggjunum. 

Hitin veksur sum heild okkurt um 3 stig fyri hvørjar 100 metrar, borað verður.