Noreg ætlar at seta 1.500 havvindmyllur upp

Norska stjórnin hevur sett sær sum mál, at Noreg skal hava sett upp 30 gigawatt havvindmyllur fyri 2040. 

Tað boðar stjórnin frá í tíðindaskrivi.

- Við hesi ætlanin fara vit úr tveimum havvindmyllum, sum eru í gongd í dag, til umleið 1.500 havvindmyllur, sigur Jonas Gahr Støre, forsætisráðharri.

Hetta svarar næstan til alla norsku vatnorkuna.

Myllurnar verða settar upp næstu 20 árini. Stjórnin umhugsar at brúka kaðalar, sum kunnu flyta orku millum Noreg og Evropa.

Kann gerast ein koddi

Norska orkunetið megnar tó ikki at taka ímóti so nógvari orku, og tí verður týðandi partur av henni útflutt, sigur stjórnin.

Umhvørvisflokkurin Tey Grønu, MDG, er fegin um, at stjórnin setur sær størri mál, men at tað er drúgv tíð til 2040.

- Málið kann gerast ein koddi. Vit mugu hava greið 2030-mál fyri havvind,  sigur Rasmus Hansson, framsøgufólk í vinnulívsmálum, við NRK.

Stjórnin skjýtur eisini upp at seta 10 milliónir norskar krónur, -tað eru 7,3 í donskum krónum, aftrat til norska havgranskingarstovnin. 

Málið er at styrkja kunnleikan um, hvørja ávirkan vindorka á havinum hevur, og hvørja ávirkan hon hevur á fiskiskap.