Svøríki biður um limaskap í NATO

Tað besta fyri trygd landsins er at gerast limur samstundis sum Finnland, sigur Magdalena Andersson, forsætisráðharri

Magdalena Andersson, forsætisráðharri, á røðarapallinum í ríkisdegnum í morgun, tá ríkisdagurin viðgjørdi ætlanina hjá stjórnini at biðja um NATO-limaskap.

Mynd: Ritzau Scanpix

Tróndur Olsen

16.05.2022 - 15:18

Svøríki fer nú at biða um limaskap í verjusamgonguni NATO.

Tað kunngjørdi svenski forsætisráðharrin, Magdalena Andersson, á tíðindafundi seinnapartin.

- Tað er tað besta fyri trygd landsins er at gerast limur í NATO samstundis sum Finnland, segði Magdalena Anderson, eftir at svenski ríkisdagurin hevur viðgjørt NATO-limaskapin í morgun.

Magdalena Andersson og andstøðuleiðarin, Ulf Kristersson, høvdu felags tíðindafund í Stokkhólmi seinnapartin.

Sí videobrot frá SVT, svenska kringvarpinum, her:

0 seconds of 0 secondsVolume 90%

00:00

Stutt eftir fráboðanina hjá svenska forsætisráðharranum, sendu Danmark, Ísland og Noreg út felags tíðindaskriv, har tey stuðla Svøríki og Finnlandi.

Tey trý londini siga, at tey saman vilja verja Finnland og Svøríki, um tey vera álopin, meðan umsóknirnar um NATO-limaskap verða viðgjørdar. Tey trý londini fara at gera alt fyri at fáa umsóknirnar viðgjørdar og avgreiddar so skjótt sum til ber.