Eldur í skorsteininum á Smyrli

Smyril fekk ikki siglt í gjárkvøldið, tí eldur var í skorsteininum.

Klokkan trý korter til seks í gjárkvøldið boðaði skiparin frá, at trupulleikar vóru við útstoytsrørinum frá høvuðsmotori tvey. Nógvur roykur var í skorsteinsrúminum. 

Staðfest var, at leki var á einum hydrauliktanga, og olja lak á bjálvingina í skorsteininum, so tað logaði nakað. 

Motorurin var tí sløktur.

Eingin vandastøða

Talan var ongantíð um nakra vandastøðu, siga Strandfaraskip landsins.

So skjótt Smyril var komin á Krambatanga, var farið undir at umvæla brekið. 

Smyril sigldi tí ikki túrarnar í gjárkvøldið.

Fólk, sum skuldu við flogari tíðliga í morgun, fóru við bátum úr Hvalba til Sands.

Smyril fór av Krambatanga klokkan fimm í morgun.