Zelenskyj hartar Týskland

Ukrainski forsetin, Volodymir Zelenskyj, heitir á týska samveldiskanslaran, Olaf Scholz, um at taka greiða støðu til kríggið við Russland.

Tað skrivar NTB.

- Vit hava brúk fyri, at Scholz vissar okkum um, at Týskland stuðlar Ukraina. Hann og stjórn hansara mugu taka støðu, segði Zelenskyj í gjár við týsku ZDF-sjónvarpsrásina.

Partur av atfinningunum hjá Zelenskyj er, at hann heldur, at Týskland má gevast við at hava javnvág í viðurskiftunum við Russland og Ukraina. 

Olaf Scholz

Olaf Scholz er týskur samveldiskanslari. (Mynd: Ritzau Scanpix)

Drálar við at senda vápn

Í samrøðuni sigur ukrainski forsetin, at Týskland m.a. drálaði við at senda Ukraina vápn.

Scholz hevur hinvegin fyrr víst aftur skuldsetingunum um vápn.

- Vit vilja senda øll vápn, sum eru góðkend, segði Scholz, sambært NTB.

Týski samveldiskanslarin leggur aftrat, at ukrainar fyrst mugu læra at brúka útgerðina.