Biden á fyrstu vitjanini í Miðeystri

Amerikanski forsetin, Joe Biden, lendi seinnapartin mikudagin í Ísrael, sum er fyrsti steðgurin á ferðini hjá honum í Miðeystri.

Í vikuni fer Biden víðari til Saudiarabia, har hann fer at royna at fáa í lag betri samskifti millum ísraelar og saudiarabar.

Amerikanski forsetin skal fríggjadagin hitta palestinska leiðaran, Mahmoud Abbas, á Vestara Áarbakka.

Hvítu húsini hava sent út eina fráboðan, áðrenn Biden kom til Miðeystur, um tøkniligt samstarv millum USA og Ísrael.

Joe Biden fer ikki at gera eina roynd at fáa glið á fastløstu friðartingingarnar millum ísraelarar og palestinar.

Vitjanin skal styrkja støðufesti í økinum og ganga ímóti iranskari, russiskari og kinesiskari ávirkan.

Biden fer undir vitjanini í Riyadh at streingja á, til tess at fáa Saudiarabia at framleiða meira olju.

Tað verður gjørt í eini vón um at fáa oljuprísirnar niður og minka um inflatiónina.