Kann taka fleiri ár at umvæla Nord Stream

Tað kann verða neyðugt at skifta ein stóran part av Nord Stream II-rørleiðingini, ið fekk skaða herfyri.

Tað sigur stjórin í Gazprom, Aleksej Miller, sambært almenna, russiska sjónvarpinum, skrivar Reuters.

Ein stórur partur av skaddu rørleiðingini, fleiri hundrað kilometrar, er eisini full av sjógvi, sigur Miller.

Fyrradagin segði stjórin í Gazprom, at tað kann taka fleiri ár at umvæla rørleiðingina, sambært Reuters.

Nord Stream gassleki, leki á Nord Stream-gassleiðing

Danmark og Svøríki siga, at sabotasja var framd á rørleiðingina.

Vil vera við í kanningararbeiðnum

Russiski forsætisráðharrin hevur sett fram áheitan um, at Russland og Gazprom kunnu vera við í kanningararbeiðnum saman við Týsklandi, Danmark og Svøríki.

Enn er orsøkin til gasslekarnar nærindis Bornholm ógreið. Sambært Danmark og Svøríki er talan um sabotasju.

Sambært russisku tíðindastovuni, TASS, hevur russiski ákærumyndugleikin sjálvur tikið stig til eina kanning.

Russiski forsetin, Vladimir Putin, hevur sagt, at talan er um yvirgang.