Rakettirnar fara báðar vegir

Í vikuni skeyt Russland hópin av langtrøkkandi rakettum inn yvir Ukraina og rakti fleiri býir sum hevnd yvir atsóknina á brúnna, sum bindur Russland og hertiknu Krimhálvoynna saman. Síðan hevur Vladimir Putin sagt, at russar fóru at steðga á við ógvusligu hevndaratsóknini. 

Men seinastu 24 tímarnar hevur Russland kortini sent fleiri rakettir inn yvir Ukraina. Tað boðar russiska verjumálaráðið frá.

Rakettirnar fara tó ikki bara ein veg longur, tí Ukraina er eisini farið at skjóta við langtrøkkandi rakettum inn yvir Russland. 

Russisku myndugleikarnir hava boðað frá, at tríggjar langtrøkkandi rakettir hava rakt russiska býin Belgorod. Tvær av rakettunum raktu flogvøllin í Belgorod, har fleiri ógvusligar spreingingar vóru. Ukrainskar rakettir raktu eisini umsitingarbygning í Donetsk, sum er hersett av russum.

Tað var eisini í Belgorod-økinum, at ellivu russiskir hermenn í gjár lótu lív, og fimtan vóru særdir, tá tveir sjálvbodnir hermenn fóru at skjóta frá hond, intil teir sjálvir vórðu skotnir.