Vilja hava smærri og bíligari íbúðir

Alsamt størri eftirspurningur er eftir smærri og serliga bíligari íbúðum. Og bústaðartørvurin hjá føroyingum broytist gjøgnum lívið.

Tað vísa nýggjastu hagtølini hjá Betri heimi.

5.449 fleiri fólk eru í Føroyum nú enn fyri 10 árum síðani. Samstundis eru 1.273 bústaðir bygdir sambært íbindingartølum hjá SEV.

94 prosent eru sethús, og bara fýra prosent eru íbúðir.

Men hetta broytist, tí 750 íbúðir eru bygdar í Føroyum seinastu 13 árini, sigur Betri heim. 

2.500 fólk á bíðilista

Okkurt um 2.500 fólk eru á bíðilistanum hjá Bústøðum, sum hevur 380 bústaðir til leigu og 146 í gerð. 

- Vit merkja stóran eftirspurning eftir íbúðum, serliga frá ungum og eldri viðskiftafólkum. 

Tey vilja hava minni bústað og størri fíggjarligt frælsi. 

Tá eldri fólk kunnu flyta í íbúð, verða sethúsini hjá teimum tøk hjá ungum familjum, sum spyrja eftir hesum bústaðarslagnum, sigur Kára á Dunga, stjóri í Betri heimi á heimasíðuni hjá Betri.