Fyrsta Airbus-flogfarið selt til USA

Atlantsflog hevur nú selt fyrsta Airbus-flogfarið, sum kom í flotan í 2012.

Tá flogfarið kom, var tað eitt nýbrot í føroyskari flogvinnu. Flogvøllurin var júst longdur, og Atlantsflog fekk hetta flogfarið serbygt til føroysk viðurskifti. Flogfarið hevði størri motorar enn vanligt, og var tað fyrsta um okkara leiðir við serligu RNP tøknini, ið gjørdi tað lættari at lenda í Vágum í vánaligum líkindum.

Nøgd við prísin

Flogfarið er nú selt til USA, og tað fer av landinum hósdagin. Atlantsflog vil ikki siga søluprísin, men Jóhanna á Bergi, stjóri, sigur, at tey eru nøgd við prísin samanborið við bókaða virðið á 10 ára gamla flogfarinum.

Í løtuni hevur Atlantsflog trý flogfør eftir. Tvey Airbus 320Neo, sum eru ávikavist frá 2019 og 2020, og eitt Airbus 320 frá 2015.

atlantsflog.jpg

Airbus-flogfarið, sum nú er selt, hevur eisini verið leigað út til annað flogfelag. Tá hevði tað hesar litirnar.

Leiga flogfar aftrat

Ætlanin er at leiga eitt flogfar aftrat í flotan frá mars næsta ár. Talan verður um eitt 10 ára gamalt Airbus 320, sum verður leigað úr Fraklandi.

Ætlanin hjá Atlantsflog er annars, at allur flotin skal vera av slagnum Airbus 320 Neo, sum eru munandi meira orkusparandi enn hini flogførini.