Agrar í staðin fyri Akrar

Sumbiar kommuna hevur fingið tilmæli frá Staðarnavnanevndini um at broyta bygdarnavnið Akrar til Agrar, altso at g kemur í staðin fyri k.

Málið er á skránni fyri bygdaráðsfundin hóskvøldið.

Men borgarstjórin, Eyðbjørn Thomsen, vónar, at til ber at útseta viðgerðina. 

Kommunan hevur júst fingið tilmælið, og tí hevði verið gott at kannað málið nærri, sigur borgarstjórin.

Ikki nýtt

Málið er ikki nýtt, tí tað var eisini frammi fyri nøkrum árum síðani. Og tá feldi bygdaráðið tilmælið.

Sambært reglugerðini um Staðarnavnanevndina hevur hon heimild at taka avgerðir í staðarnavnaspurningum. Avgerðir hjá Staðarnavnanevndini kunnu kærast til landsstýrisfólkið í mentamálum. 

Reglugerðin sigur eisini, at Staðarnavnanevndin hevur skyldu til at hoyra avvarðandi kommunur og myndugleikar í sambandi við áseting av formi og stavseting av staðarnøvnum.