Brasil: 1200 fólk handtikin

Fleiri enn 1200 fólk eru handtikin, eftir at fleiri túsund mótmælisfólk lupu á brasilska tjóðartingið og aðrar almennar bygningar í gjár.

- Tað fer ikki at eydnast teimum at beina fyri fólkaræðinum í landinum. Tað eiga vit at gera greitt, bæði við fastleika og sannføring, sigur løgmálaráðharrin í Brasil, Flávio Dino, sambært Reuters.

Viiðhaldsfólk hjá fyrrverandi forsetanum, Jair Bolsonaro, trokaðu seg inn í tjóðartingsbygningin í gjár í høvuðsstaðnum, Brasilia, og framdu herverk.

Bolsonaro hevur ongantíð viðgingið, at hann tapti forsetavalið fyri Lula da Silva, men hann hevur víst aftur, at hann eggjaði viðhaldsfólki sínum at leypa á tjóðartingið.

- Vit góðtaka ikki, at brotsgerðir verða framdar í einum politiskum stríði. Ein brotsmaður verður viðfarin sum ein brotsmaður, sigur løgmálaráðharrin.