Fiska nú lodnu í íslendskum sjógvi

Lodnufiskiskapurin í íslendskum sjógvi er byrjaður.

Fríggjakvøldið í síðstu viku byrjaði grønlendska skipið Polar Ammassak at fiska lodnu 80 fjórðingar í ein landnyrðing eystan úr Langanesi.

Skiparin letur væl at fiskiskapinum, skriva Fiskifréttir. Teir fingu upp í 350 tons í hálinum. Í seinasta hálinum vóru tó 600 tons.

Lodnan er góð, sigur hann. 35 til 37 fiskar fara til eitt kilo.

Einki annað skip var har á leiðini, sigur skiparin. Hann sigur, at ikki var neyðugt at leita eftir lodnuni. Teir funnu hana alt fyri eitt.

Fiska meira um náttina

Meira fekst um náttina enn um dagin, sigur skiparin á Polar Ammassak.

Hann sigur eisini, at veðrið á leiðini var gott.

Og Polar Ammassak landaði á Norðfjørðinum í gjár. Skipið hevði 2.000 tons, sum fara til mjøl og lýsi.

Polar Ammassak fekk tey 2.000 tonsini í seks hálum.

Havrannsóknarskipið Árni Friðriksson fer út at leita eftir lodnu í dag.