- Tíðindi, mentan og ítróttur
Zelenskyj vil hava ES at herða revsitiltøkini
Ukrainski forsetin, Volodymyr Zelenskyj, vil hava ES at herða revsitiltøkini móti Russlandi.
Tað hevur hann gjørt greitt fyri forsetanum í ES-nevndini, Ursulu von der Leyen, sum í løtuni er í Kyiv á vitjan.
Á einum felags tíðindafundi hjá teimum báðum helt Zelenskyj, at trýstið frá ES á Russland er minkað seinastu tíðina.
Fjórða vitjanin
Á Twitter skrivar Ursula von der Leyen, at hetta er fjórðu ferð, hon vitjar í Kyiv síðani russisku innrásina, og at hon hevur sínar nevndarlimir við hesaferð. Hetta er fyri at vísa, at ES stendur líka sterkt saman við Ukraina sum altíð, og at samstarvið skal styrkjast.
Ursula von der Leyen sigur, at ES vónar, at ein nýggjur pakki við revsitiltøkum er klárur fyri ársdagin fyri russisku innrásina, tann 24. februar.