Kravboð um at gjøgnumganga allar KT-skipanir

Í september 2022 fekk Dátueftirlitið eina fráboðan um eitt álvarsligt trygdarbrot hjá einum almennum stovni. 

Hetta var í sambandi við dagføring av eini KT-skipan hjá stovninum.

Dátueftirlitið kom til ta niðurstøðu, at stovnurin hevði brotið eina grein í dátuverndarlógini, tí stovnurin hevði ikki viðgjørt persónupplýsingarnar á ein hátt, sum tryggjar nøktandi trygd av persónupplýsingum. 

Viðkvæmar upplýsingar

Av tí at talan var um eina KT-skipan við persónupplýsingum um allar borgarar í Føroyum, harav ein partur er viðkvæmar upplýsingar, og tí sera nógv óviðkomandi høvdu havt atgongd í eitt langt tíðarskeið, metti Dátueftirlitið, at talan var um eitt sera álvarsligt trygdarbrot.

Stovnurin fekk tí álvarsliga átalu og kravboð um at gjøgnumganga allar sínar KT-skipanir fyri at tryggja, at hesar vóru settar rætt upp, hvat atgongdarstýring viðvíkur.