Eysturoyartunnilin stimbrar fólkatalið

At vit í fjør gjørdust 678 fólk fleiri, sum búgva í Føroyum, sæst fyrst og fremst aftur í kommununum við báðar endar á Eysturoyartunlinum.

Mesti fólkavøksturin var í Tórshavnar, Runavíkar og Sjóvar kommunum og teimum á baki kom Nes kommuna, ið fyri fyrstu ferð fór upp um 1500 íbúgvar og nú hevur fingið býarheiti.

Tórshavnar kommuna vaks í fjør við 348 íbúgvum, Runavíkar kommuna við 77, Sjóvar kommuna við 56 og Nes kommuna við 51 íbúgvum.

Í níggju av teimum 29 kommununum kring landið fall fólkatalið.

Mest í Sumbiar kommunu, har fólkatalið fall við 14 íbúgvum.