Føroyskur fiskur á Michelin-matstovu

Í vikuni hevur Kósin havt vitjan av 2-stjørnaðu Michelin matstovuni Venta Moncalvillo, sum liggur í Rioja økinum í Spania. Vitjanin varð samskipað saman við felagnum Bacalaos Alejandra, sum er ein av mongum fiskakeyparum hjá Kósini, og sum dagliga selur fisk frá føroyska virkinum til matstovuna.

Matstovan fekk sína fyrstu Michelinstjørnu í 2010, og tann næsta verður givin teimum í ár.

Echapresto beiggjarnir eru sera frammarliga í sponsku matstovuvinnuni, og kokkurin Ignacio varð ársins kokkur í Madrid Fusion 2021.

Matstovan Venta Moncalvillo liggur í eini lítlari bygd við einans 24 íbúgvum. Og maturin í køkinum er grundaður í nærumhvørvinum, hvussu urtagarðurin verður heystaður við denti á, og at hetta verður gjørt umhvørvisvinarligt. 

Garðurin verður brúktur dagliga, soleiðis at kundin altíð fær bestu rávøruna saman við hágóðsku toskinum.

Jógvan Hansen, framleiðsluleiðari á Kósini, sigur, at hann er takksamur fyri hetta samstarvið, sum er sera spennandi og mennandi fyri starvsfólkini á Kósini, tí fiskurin skal hava allar hægstu góðsku. Og hetta klárar Kósin at liva upp til, leggur hann afturat.

Í sambandi við vitjanina hevur Kósin fyriskipað ymsar ferðir kring landið og vitjan á ymsum matstovum í Føroyum.