Eftirlønarkundar verða betur kunnaðir

Nú fáa fólk greiðari boð um, hvussu nógv tey gjalda fyri sína eftirlønaruppsparing.

Øll føroysku lívstryggingarfeløgini og eftirlønargrunnarnir hava gjørt avtalu um betri kunning.

Avtalan merkir, at einaferð um árið skulu lívstryggingarfeløgini og eftirlønargrunnarnir á ein skipaðan hátt upplýsa kundan um, hvussu nógv hann hevur rindað í krónum og í prosentum fyri sína eftirlønaruppsparing.

Sami uppgerðarháttur

Tey hava í avtaluni bundið seg til at brúka sama uppgerðarhátt.

Avtalan kemur í gildi soleiðis, at í seinasta lagi 1.september í ár skal eftirlønarkundin fáa upplýst, hvussu nógv hann í 2023 hevur goldið í krónum og í prosentum fyri sína eftirlønaruppsparing.

Avtalan fevnir ikki um eftirlønaruppsparing í peningastovnum.

Feløgini hava síðani 2018 í samstarvi við Tryggingareftirlitið arbeitt við at seta í gildi eina skipan, sum tey hava havt í Danmark síðani 2010.