Einki navnloysi kann geva færri fráboðanir

Vandi kann vera fyri, at fyritøkur fara at halda seg aftur við at fráboða trygdarbrot til Dátueftirlitið, nú avgerðir vera almennakunngjørdar uttan navnloysi.

Tað sigur Føroya arbeiðsgevarafelag um ætlaðu broytingina í dátuverndarlógini. 

Eisini spyr Arbeiðsgevarafelagið, hví almennir myndugleikar ikki vera revsaðir fyri brot á dátuverndarlógina á sama hátt sum privatir.

Revsingin eigur at vera tann sama fyri øll, almenn og privat, heldur felagið.

Løgmálaráðið ætlar at fáa løgtingið at broyta lógina um at verja persónsupplýsingar, so kravið um navnloysi, tá Dátueftirlitið kunnger sínar avgerðir, skal bara vera galdandi fyri einstaklingar

Avgerandi neyðugt

KT-felagið hevur eisini havt uppskotið til hoyringar.

Tað tekur undir við, at avgerðir hjá Dátueftirlitinum ikki longur skulu vera navnleysar, tá tær eru um fyritøkur.

Men felagið leggur stóran dent á, at einstaklingar framvegis vera navnleysir.

Vandi má ikki vera fyri, at starvsfólk vera navngivin í avgerðum hjá Dátueftirlitinum, sum vera almannakunngjørdar, sigur KT-felagið.