Drekin framleiðir nú streym inn á netið hjá SEV

Nýggi 1,2 MW drekin hjá svensku fyritøkuni Minesto var í morgun settur út í Vestmannasund. Hann framleiðir nú streym inn á netið hjá SEV.

- Hetta er ein stórur dagur fyri Minesto. Vit hava rokkið einum týðandi varða í søguni hjá felagnum við at framleiða orku inn á eitt elnet í megawatt stødd. Vit eru errin og glað, sigur Martin Edlund, stjóri í Minesto.

Minesto hevur seinastu trý árini gjørt royndir við tveimum 100 kilowatt drekum, men hesin drekin er 12 ferðir størri.

800 húsarhald

Veingjabreiðið á drekanum er 12 metrar, og hann vigar 28 tons.  Drekin framleiðir streym til umleið 800 húsarhald.  

Hann er settur á botnin í Vestmannasundi, á 72 metra dýpi, og fer at sveima í eini áttatalsrás, meðan rákið er. Á tann hátt framleiðir hann orku.

Úr fundamentinum verður sjókaðal førdur til Vestmanna og inn á netið hjá SEV.

Lundir á fleiri firðum

Minesto hevur stórar ætlanir við sjóvarfalsorkulundir kring landið. Millum annað í Hestfirði, Skopunarfirði, Leirvíksfirði, Svínoyarfirði, Skúvoyarfirði, Suðuroyarfirði og sunnan fyri Akraberg. Fyrst verður tað í Hestfirði, har ætlanin er at hava 24 drekar.

Loyvi eru tó ikki fingin enn.

Fær Minesto loyvi at seta allar orkulundirnar upp kring landið og at framleiða inn á netið hjá SEV, fer tað at nøkta nærum helmingin av orkutørvinum í Føroyum.