FMA 2024: "Literally Everything" er ársins sangur

Helena Heinesen Rebensdorff eisini kend sum Brimheim hevur júst vunnið sína aðru virðisløn til ársins FMA.

Fyrst vann hon ársins myndlistarliga samleika, og nú hevur sangurin hjá Brimheim "Literally Everything" vunnið virðislønina sum ársins sangur í einum ári, har metnógvir føroyskir sangir vóru givnir út. 

Brimheim er glóðheit á bæði føroyska og útlendska tónleikapallinum í løtuni. "Literally Everything" hevur eitt nú verið tráspældur á útvarpsrásunum P3 og P6 hjá Danmarks Radio, síðani sangurin gjørdist "Ugens uundgåelige" hjá rásini P3 fyrst í oktober mánaða í fjør, júst sum sangurin kom út. Og á stroymingartænastuni Spotify er sangurin spældur yvir 260.000 ferðir.  

Tað var mamma Helenu, Elin Brimheim Heinesen, sum tók ímóti virðislønini vegna Brimheim, sum er stødd í París í kvøld. 

- Eg veit, at Helena er sera glað fyri hesa virðislønina, og eg skal vegna hana takka øllum teimum, sum hon hevur arbeitt saman við, og takka vinum hennara, sum lyfta hana upp so miriliga, segði ein sjónliga errin mamma. 

FMA-heiðurslønir

12 heiðurslønir vera latnar til ársins FMA. Higartil eru altso seks virðislønir latnar. 

Ársins klassiski heiður: Kristina Thede Johansen 

Ársins spíri: SUPERVISJÓN

Ársins tónasmiður: Tróndur Bogason

Ársins tónleikari: Per Ingvaldur Højgaard Petersen

Ársins myndlistarligi samleiki: Brimheim

Ársins sangur: "Literally Everything" - Brimheim