Eingin politikkur í húsaleigu og útboði

Húsaleigan hjá Bústøðum verður ikki ásett politiskt.

Leiðslan í Húsalánsgrunninum ásetur húsaleiguna.

Tað sigur Ingilín D. Strøm, landsstýriskvinna, í svari til Elsebeth Mercedis Gunnleygsdóttur, løgtingskvinnu, sum spurdi, um landsstýriskvinnan tekur undir við, at Bústaðir hækka leiguprísirnar.

Ingilín D. Strøm sigur, at hon leggur seg heldur ikki útí, hvussu Húsalánsgrunnurin verður rikin.  

Hon sigur, at hon fer tí ikki at leggja útí, hvønn útboðspolitikk stovnurin hevur, so leingi hann er sambært lógini.

Landsstýriskvinnan sigur, at stýrið fyri Húsalánsgrunnin hevur kunnað Umhvørvismálaráðið um, at arbeitt verður miðvíst við at minka rakstrarútreiðslurnar.

Ingilín D. Strøm sigur eisini, at uppskot eru ávegis, sum skulu loyva kommunum at taka tænastugjøld fyri tóm hús og áseta bústaðaskyldu í nýggjum útstykkingum.