FT-stjórin um semjuna: Óheppin mál, sum fóru ov langt

- Hetta hava verið sera óheppin mál hjá Føroya Tele, har farið er ov langt.

Tað sigur Kristian Reinert Davidsen, stjóri í Føroya Tele, um semjuna, sum er gjørd við Kappingareftirlitið, har Føroya Tele eisini viðgongur, at felagið hevur brotið lógina.

Í gjár boðaðu Føroya Tele og Kappingareftirlitið frá, at semja er gjørd í málinum um tær 45 milliónirnar, sum Kappingareftirlitið metti, at almenna partafelagið skuldi rinda í bót. 

Í málinum um Nema ásetti Kappingareftirlitið bótina til 18 milliónir kr., og í Tosa-málinum varð bótin ásett til 27 milliónir.

Føroya Tele

Brotið kappingarlógina

Tosa-málið er slept, meðan Nema-málið stendur við.

Føroya Tele váttar sostatt, at felagið hevur brotið kappingarlógina.

Kristian Reinert Davidsen vil ikki siga, hvussu stóra bót Føroya Tele skal rinda, men vísir til Kappingarráðið. 

Men Terje Sigurðsson, stjóri í Kappingareftirlitinum, vil heldur ikki siga, hvussu stór bótin er.