Katrín bíðar eftir avloysara

Tað er enn ikki greitt, hvat hendir við íslendsku stjórnini, nú forsætisráðharrin Katrín Jakobsdóttir hevur boðað frá, at hon leggur frá sær sum stjórnarleiðari.

Tað ger hon, tí hon stillar upp til íslendska forsetavalið.

Íslendska kringvarpið RÚV skrivar, at sitandi íslendski forsetin Guðni Th. Jóhannesson hevur tosað við leiðararnar í teimum trimum samgonguflokkunum, sum hava boðað forsetanum frá, at teir allir eru sinnaðir at halda fram við samgongusamstarvinum. Flokkarnir eru Sjálfstæðisflokkurin, Framsóknarflokkurin og Vinstra-Grøni flokkurin.

Fríggjadagin legði Katrín Jakobsdóttir frá sær sum forkvinna hjá Vinstra-Grøna flokkinum, men hon hevur játtað at vera sitandi sum forsætisráðharri, til samgonguflokkarnir hava funnið eina semju um, hvør skal koma í hennara stað.

Seinnapartin í dag var Katrín Jakobsdóttir á Bessastøðum á fundi við Guðni Th. Jóhannesson, og aftan á fundin tosaði sitandi forsetin við fjølmiðlarnar.

Tað er ongantíð fyrr komið fyri í Íslandi, at sitandi forsætisráðharrin stillar upp til forsetaval. Spurdur, um hann heldur tað vera óheppið, at Katrín Jakobsdóttir stillar upp, svaraði Guðni Th. Jóhannesson, at tað helt hann ikki.

"Um tað skuldi verið mett sum óheppið, høvdu vit havt onkra avmarking fyri tí í okkara grundlóg. Tað eru ávísar reglur fyri valbæri, og tær haldi eg vit kunnu vera rættiliga fegin um," segði íslendski forsetin.

Sjálv hevur Katrín Jakobsdóttir onga ávirkan á, hvør skal avloysa hana sum forsætisráðharri. Hon vísir á, at nú hon hevur tikið seg úr stjórnini, er tað blivið uppgávan hjá onkrum øðrum at loysa.

Katrin Jakobsdóttir hevur verið íslendskur forsætisráðharri í seks ár. Longst sitandi forsætisráðharri í Íslandi var Davíð Odsson, sum sat í 13 ár frá 1991 til 2004.

Forsetaval verður í Íslandi 1. juni í ár.