Lendisgøta uppkallast eftir Eliasi

Elias Ellefsen á Skipagøtu, sum fyrr í ár var kosin heimsins besti ungi hondbóltsspælari, fær nú gøtu navngivna eftir sær.

Tórshavnar býráð vil, at gøtan millum Klingruna og nýggju stórhøllina við Tjarnir í Hoyvík skal eita “Skipagøta”. Málið kemur fyri á býráðsfundinum í kvøld.

Kommunan sigur, at stórhøllin við Tjarnir liggur nakað langt burtur frá bygda umhvørvinum, og tí er stig tikið til at gera eina gøtu frá Klingruni og niðan gjøgnum vátlendi, framvið Stórutjørn, heilt niðan til stórhøllina. Og tað er hendan gøtan, sum skal eita Skipagøta eftir Eliasi Ellefsen á Skipagøtu.

Býráðið grundgevur avgerðina við, at Elias hevur saman við sínum liðfeløgum, Hondbóltssambandinum og hondbóltsfamilju sínari veruliga sett hondbóltin í Føroyum á breddan og Tórshavnar kommuna vil staðfesta og heiðra hansara persónligu góðu og merkisverdu avrik.

Í sambandi við ætlanina, hevur umsitingin vent sær til Sprotan fyri at vita, um "Skipagøta" er brúkt til annað staðarnavn ella gøtunavn. Sprotin hevur upplýst fyri kommununi, at tað er tað ikki.

Stórhøllin við Tjarnir verður eftir ætlan liðug um ársskiftið.