Føroya Tele 20 mió. kr. í avlopi eftir skatt

Føroya Tele hevði 20 milliónir krónur í avlopi eftir skatt í 2023. 

Kappingarmál kosta nógv, avseting til sekt í 100 GB-málinum, settar eru av tríggjar milliónir til ta sektina, og seks milliónir krónur í niðurskriving av Huawei-kjarnuútgerðini gjørdu, at ársúrslitið gjørdist nakað lakari enn ætlað, sigur Føroya Tele.

20 milliónir eru tó meira enn í 2022, tá úrslitið var 14 milliónir eftir skatt.

Men tað var góðar 40 milliónir í 2021.

Føroya Tele-samtakið gjørdi íløgur fyri 184 milliónir krónur í fjør.

Bjarni Arnason, nevndarform Føroya Tele

Bjarni Arnason heldur fram sum nevndarformaður í Føroya Tele. (Mynd: Bjarni Árting Rubeksen)

30 mió. í vinningsbýti

Á aðalfundinum í gjár var samtykt at lata landsstýrinum, sum eigur allan partapeningin í samtakinum, 30 milliónir krónur í vinningsbýti. 

Tað er tað sama sum í 2022 og 2021.

Skuldin var 338 milliónir. Hon var 225 milliónir við ársenda 2022.

Í samtaksnevndini eru Bjarni Arnason, formaður, Johnni M. Poulsen, næstformaður, Lena L. Mohr og Annbritt Tummasdóttir Andersen.

Landsstýrið hevur valt tey.

Starvsfólkini hava valt Ólav Simonsen, Levi T. Nybo og Janus Djurhuus.