Semingsmaðurin skal hava svar á middegi

Tá klokkan var farin av eitt í nátt, handaði semingsmaðurin, Terje Sigurðsson, Havnar Arbeiðarafelag, Klaksvíkar Arbeiðsmannafelagið, Klaksvíkar Arbeiðskvinnufelag, Føroya Arbeiðarafelag og Føroya Arbeiðsgevarafelag eitt semingsuppskot.

Partarnir skulu svara í seinasta lagi á middegi í dag.

Terje Sigurðsson fæst einki at siga enn um støðuna, og um hvørjar vónir hann hevur til, at partarnir taka undir við uppskotinum.

- Men tá mann ger eitt uppskot, hevur mann eina vón, sigur hann í stuttari viðmerking.

Um sáttmálarnir fara úr gildi, ber til hjá pørtunum at lýsa ein arbeiðssteðg sambært avtaluni um fráboðanarfreist. 

Avtalan sigur, at ein møguligur arbeiðssteðgur skal fráboðast við í minsta lagi 48 tímum til á middegi ella á midnátt og kann ikki fráboðast, fyrr enn sáttmálarnir eru farnir úr gildi, og semingsstovnurin er givin við semingsroyndum sínum.

Havnar Arbeiðskvinnufelag samráðist ikki saman við hinum feløgunum, men fyri seg sjálvt.

Tær samráðingarnar vórðu steðgaðar fyribils í gjár, og verða tiknar upp aftur, tá samráðingarnar hjá hinum feløgunum eru avgreiddar.