ES heitir á Ísrael um at taka undir við vápnahvíld

ES heitir á Ísrael og Hamas um at góðtaka uppskotið, sum Joe Biden, forseti USA, hevur lagt fram um vápnahvíld, og hvussu kríggið kann enda.

Uppskotið er gjørt í samráði við ísraelska forsætisráðharran, Benjamin Netanyahu. 

Men eftir at Joe Biden fríggjadagin kunngjørdi uppskotið, hevur ísraelski forsætisráðharrin úttalað seg um, at hann tekur ikki undir við avtaluni. 

Hvítu húsini í Washington hava svarað aftur, at væntað verður, at Ísrael tekur undir við avtaluni, um Hamas góðtekur hana.

Trý stig

Ætlanin er í trimum stigum: at steðga krígnum so líðandi, at vápnahvíld í longdini verður varandi, og at Ísrael fer úr palestinskum øki. 

ES tekur fult undir við uppskotinum.

Umboð fyri Katar, USA og Egyptaland hava verið millumgongufólk millum Ísrael og Hamas í fleiri vikur í royndini at fáa vápnahvíld í lag, og at býta ísraelskar gíslar um við palestinar, sum sita í ísraelskum fongsli. 

Hvørki Ísrael ella Hamas hava alment tikið undir við ella vrakað uppskotið um vápnahvíld.

Leiðararnir í G7-londunum taka fult undir við amerikanska uppskotinum um vápnahvíld, og uttanríkisráðharrar í Saudiarabia, Jordan, Sameindu arabiskum emiratunum og Egyptalandi eru eisini jaligir.