Verkfallið er avblást: Her er semjan og samrøður

Í roynd og veru er talan um tvær avtalur, sum blivu undirskrivaðar á skrivstovuni hjá Semingsstovninum fyri løtu síðani. Eitt semingsuppskot og ein avtala um serstakt lønarlyft. 

Semingsuppskotið sigur í stuttum, at: 

1. mai 2024 hækkar grundlønin 3,25% 

1. mai 2025 hækkar grundlønin 3,23% 

Harumframt verður latin ein serlig viðbót fyri reingerð, sum er 0,33% um tíman, og kemur tað í gildi afturvirkandi frá 1. mai 2024. 

Og so kemur nakað oman á eftirlønina, ið arbeiðsgevararnir skulu rinda. Frá 1. mai 2024 verður eftirlønin 11,2%, og frá 1. mai 2025 verður eftirlønin 12%. Lønarkarmurin í semingsuppskotinum er tilsamans 8,2%. 

Serstakt lønarlyft 

Hin avtalan, sum er undirskrivað í kvøld, er ein avtala um serstakt lønarlyft, ið kemur afturat lønarhækkingini, ið er nevnd omanfyri. Serstaka lønarlyftið merkir, at 1. mai 2024 hækkar lønin 3,75 krónur um tíman. Og 1. mai 2025 hækkar lønin 3,50 krónur um tíman. Ongar viðbøtur verða roknaðar av serstaka lønarlyftinum. 

Til ber at siga, at við hesum leistinum hevur privati arbeiðsmarknaðurin endurtikið leistin hjá landsstýrinum, sum valdi at geva nøkrum fakbólkum á almenna arbeiðsmarknaðinum eitt serstakt lønarlyft. 

13 prosent 

Tilsamans geva avtalurnar 13 prosent í lønarhækkan yvir tvey ár. Arbeiðaralønin hækkar tilsamans 16,80 krónur. Tíggjukrónan um árið, ið fakfeløgini fóru eftir, bleiv tá avtornaði til 8,40 krónur. 

Fyrsta árið hækkar lønin 8,46 krónur, og seinna árið hækkar lønin 8,34 krónur um tíman. 

Semingsuppskotið og avtalan um serstaka lønarlyftið eru undirskrivað av Føroya Arbeiðarafelag, Havnar Arbeiðarafelag, Havnar Arbeiðskvinnufelag, Klaksvíkar Arbeiðskvinnufelag og Klaksvíkar Arbeiðsmannafelag øðrumegin og Føroya Arbeiðsgevarafelag hinumegin. 

Georg F. Hansen, formaður í Føroya Arbeiðarafelag, er rímuliga væl nøgdur, nú verkfallið, ið byrjaði á midnátt mánakvøldið 13. mai, er avblást: 

Niels Vinther, stjóri í Vinnuhúsinum, er ikki so væl nøgdur. Sambært honum verður sáttmálin ein dyggur smeitur hjá nógvum fyritøkum, og kann allarhelst hava við sær uppsøgnir: 

Terje Sigurðsson hevur staðið fyri semingsroyndini. Hann sendi stríðandi partarnar til hús um ellivutíðina fríggjakvøldið, men slepti tó ongantíð endanum. Undan semingsroyndini, ið byrjaði hósmorgunin, hevði hann roknað við einari drúgvari seming, ið kundi vara alt vikuskiftið. Og nú eydnaðist: