EM 2024: Danska lagnan skal avgerast í München

Alt kann henda, tá Danmark spælir ímóti Serbia í München í 3. umfari í bólki C í kvøld.

Javnleikur er nóg mikið fyri at tryggjað dønum víðari spæl í EM-endaspælinum, meðan Serbia hevur fyri neyðini at fáa øll trý stigini. 

Vinna danir, enda teir annaðhvørt á 1. ella 2. plássi. Tað er treytað av úrslitinum ímillum England og Slovenia, sum eins og danir spæla klokkan 20.00.

 - Vit skulu spæla dystin fyri at vinna, eisini tí vit fegnir vilja uppliva at vinna, segði danski venjarin, Kasper Hjulmand.

20240622-114959-l-1448x1109ma.jpg

Hjá Onglandi kann javnleikur vera nóg mikið fyri at tryggja sær fremsta plássið í bólkinum, men avrikini hjá ensku heimsstjørnunum hevur ikki verið sannførandi higartil. Enskir miðlar skriva, at Liverpool-stjørnan Trent Alexander-Arnold helst ikki verður á vøllinum frá byrjan og Chelsea-miðvallarin Conor Gallagher byrjar inni í staðin.

Lítil spenningur í bólki D

Í bólki D er nærum avgjørt, at Frakland, Holland og Eysturríki øll koma víðari í kappingini. Fjórða liðið, Pólland, er longu sligið út.

Frakland spælir ímóti Póllandi, og franski venjarin, Didier Deschamps, hevur boðað frá, at stjørnuframherjin hjá fraklendingum Kylian Mbappé, sum breyt nøsina í fyrsta bólkadystinum, er klárur at spæla.

Í hinum dystinum spæla Holland og Eysturríki, har eysturríkarar bara ikki skulu tapa ov stórt fyri at tryggja sær at koma víðari, sum eitt av bestu liðunum á 3. plássi . 

20240623-193107-l-3000x2041ma.jpg