Váttar at starvsfólk búgva í Skálagarði

Tað er rætt, at starvsfólk í Skálagarði búgva í Skálagarði.

Hetta váttar Sirið Stenberg, landsstýriskvinna, í svari til Elsebeth Mercedis Gunnleygsdóttur, løgtingskvinnu.

Hon spurdi, um fólk úr øðrum londum eru komin at arbeiða í Skálagarði.

Og, um hesi fólkini búgva í Skálagarði.

Sirið Stenberg sigur, at enn er ikki fult virksemi í Skálagarði, tí tað er trupult at fáa skikkað starvsfólk.

Tí er einki virksemi á ovastu hæddini, og starvsfólkini húsast á hesi hæddini. 

Tá stutt er millum vaktir, er ikki óvanligt, at starvsfólk sova í tómu kømurunum. 

Soleiðis var eisini, áðrenn danskir vikarar komu.

Danskir vikarar 

17. juni byrjaðu trý fólk frá danskari vikarstovu í Skálagarði.

Tey eru fyribils sett í 14 dagar.

Fýra fólk, sum hava seinheilaskaða, hava fastan bústað í Skálagarði. Og tvey hava fyribils bústað har.

Eingin er í umlætting, tí starvsfólkatrot er.

Í Skálagarði er pláss fyri 15 fólkum. 

Hetta krevur 24 fulltíðarsett starvsfólk, sigur landsstýriskvinnan.