Vilja hava fólkaatkvøðu um Eurovision

Non-bineri sangarin Nemo vann Eurovision sangkappingina fyri Sveis í ár, og tað merkir, at Sveis skal vera vertur fyri kappingini næsta ár.

Higartil hava býirnir Basel, Zurich, Geneve og Bern boðið seg fram at hýsa kappingini, men, stendur tað til konservativa flokkin EDU, skal tað út til fólkaatkvøðu, um endaligi vertsbýurin skal hava lán frá tí almenna til at skipa fyri kappingini.

EDU skrivar á sosialum miðlum, at "Eurovision er tað reina propaganda, og at kappingin eftirhondini er vorðin óúthaldiliga destruktiv og ábyrgdarleys". 

Við hesum sipar konservativi flokkurin til, at alsamt fleiri sangarar úr LGBT+ umhvørvinum eru við í sangkappingini.

Sveis er kent fyri at hava fólkaatkvøður um nógv ymisk politisk mál, og EDU heldur, at fólkið eisini eigur at sleppa at siga sína meining um, hvussu skilagott tað er at brúka almennar pengar uppá Eurovision.