Vilja hava inngjaldið minkað einaferð enn

Tað gongur so væl hjá Arbeiðsloysisskipanini, at stýrið hevur biðið Ingilín D. Strøm, landsstýriskvinnu, lækka inngjaldið á nýggjárinum.

Tað kann hon gera við kunngerð.

Stýrið vil hava inngjaldið niður í 0,6 prosent.

Tað fór úr einum prosenti niður í 0,8 prosent 1. januar í ár.

Loftið lækkaði eisini

Inngjaldsloftið var 650.000 krónur, men tað lækkaði eisini 1. januar.

Fyrr var hámarkið fyri inngjaldi 6.500 kr. um árið.

Tað er nú 5.200 krónur um árið.

Lækkingarnar gera, at ALS samanlagt fer at fáa 100 mió. krónur minni í 2024 og 2025 enn ALS hevði fingið, um inngjaldið framvegis var eitt prosent, sigur stýrið.

Í nógv ár var inngjaldið 1,25 prosent. Men í 2021 fór tað niður í eitt prosent.

Tá verandi lóg um ALS kom 1. juli í 1997, var inngjaldið 2,5 prosent. Men tað fór niður í 2,25 1. januar í 1998.