Varðhaldsfongslingin hjá Watson longd í tríggjar vikur

Í dag skuldi rætturin í Nuuk gera av, um Paul Watson framhaldandi skal vera í varðhaldi.

Dómur er nú sagdur í málinum, og Paul Watson skal sita varðhaldsfongslaður fram til 5. september, har hann skal bíða eftir avgerðini frá danska løgmálaráðnum, hvørt hann skal útflýggjast til Japans ella ikki.

Sermitsiaq skrivar, at Paul Watson fekk loyvi at koma til orðanna í rættinum, men rætturin noktaði at síggja videoupptøkur úr Whale Wars-røðini, sum verjin hjá honum annars ynskti at vísa rættinum, tí ákæruvaldið førdi fram, at tað fór ikki at bera til at kanna, um videobrotið varð manipulerað.

Í samband við úrskurðin, so segði dómarin, at útsagnirnar hjá Paul Watson í dag ikki broyta støðuna.

Tað var í 2010, at japanskir myndugleikar góvu boð um, at Paul Watson skuldi handtakast fyri eina atsókn í Antarktis, har hann legði seg út í arbeiðið hjá hvalaveiðifólki úr Japan.

Boðini um at handtaka Paul Watson hava staðið við líka síðani 2010.

Paul Watson hevur kært avgerðina til grønlendska landsrættin, sum nú skal gera avgerð í málinum.